(中文) 光影鏡頭實驗室 aka. Light Lens Lab: 周制八枚玉

light lens lab Summicron 8 element

徕卡萬歲 !!

2019 年尾開始, 外國傳聞有支中國製嘅 Leica Summicron 35mm f2 八枚, 個個讚不絕口. 搵下有無 sample 相, 想用自己對眼去評, 唔想人噏我就信. 點知又搵唔到相, 以為支鏡係另一吹水鏡, 就咁無再理會 !! 講真, 作為半個 Leica 用家, 點會放 generic Leica, 仲要係中國製, 在眼內. 作為粉絲, 次次經過 L Shop 都會怪叫 “徕卡萬歲!!! ”

周制八枚玉

跳到今日 2021年, 同 Jeffo 吹水, 吹吹下條友話我知佢有支傳說中嘅周制八枚 (China-made Summicron 35/2) !!仲立即攞支鏡出嚟 !!! 鏡身用銅, 細細支又金金地, 第一眼覺得幾靚仔. 一攞上手感覺 “嘩!!! 聚手呀喂 !!” 唔信邪, 作為”德國正統”愛好者, 就係要搵嘢嚟挑: 

擰下對焦 : 非常之順滑
扭下 aperture : 一 click 一 click 收光圈, 暢順有餘
插支鏡喺部 MM: 剛剛好, 四平八穩好骨子

或者我攝影經驗唔夠或要求低, 我無嘢可以彈支中國製八枚玉: 要手感, 有手感 ! !要手工, 有手工 !!
當然支鏡手工 good, 手感又 very good, 但影唔到相, 有屁用 ! 即刻老笠 Jeffo 支鏡出街玩下, 實實際際用支鏡,  睇睇支鏡有乜咁把砲稱自己做 Summicron 35/2 8 Elements, 徕卡歷史中一支名鏡 !!! 繼續搵嘢嚟挑, 捍衛自身高級品味 !!

Summicron 8 element light lens lab review

Facebook 睇多啲 sample 相

有 join 我哋個 facebook group 都應該睇過啲試機試鏡 sample 相, 大家覺得點呢 ?? 自己就非常鍾意, 真金白銀買咗中國製嘅鈦版八枚玉. 完全無人 sponsor 我哋. 

試機試鏡, 或所謂實測相機鏡頭, 最重要就緊係要有好多相, 唔係測嚟把鬼 ? 街頭攝影, 個人覺得係最實際方法一種: 佢影到, 你又影到. Shutter Alliance 主打 street photography 而唔係留喺屋企打燈用激光射支鏡塊玻璃, 再望望個 chart  睇下支鏡有冇變形或走焦或有冇 chromatic abberation, 再喺電腦睇四角有冇鬆, 放大有幾 sharp !! 或者呢啲先叫專業 ?! 究竟我哋鍾意影相, 定話鍾意射激光讀數據 ?? 

新鏡頭, 復古味道

老實講, 今時今日科技 very 先進, 支支新鏡接近完美,  分別只有大光圈或細光圈, 自動對焦有幾快, 唔同焦段. 唔好話乜乜神鏡影出嚟顏色好艶麗 !!  相機有 RAW 係畀用家調節顏色, 調色調到自己鍾意, 方便凸顯自我品味, 激勵好色之徒 🙂 

個人覺得, 因為現代鏡成像支支差不多, 自己擁有一兩支新鏡就夠皮. 相反, 尋求老鏡, 追求不完美 (characteristics) 正正就是重點 !! 周制八枚最成功, 就係填補到呢個市場需求: 經典老鏡味, 靚做工, 復古 outlook, 再嚟個適合定位價 (重之平過二手正宗 Summicron) 啱晒任何對街頭攝影有興趣嘅攝影人, 或對 Leica 有好奇心但又嫌佢貴, 一個非常好而又不失禮嘅入門選擇 ! 我唔知 suggested retail price 係乜(未出), 亦唔知街價是否海鮮價 !! So don’t ask me !!

Summicron 8 element light lens lab review

似 Leica 八枚

咁究竟周制八枚成像似唔似原廠 Leica Summicron 35/2 8 Elements ? 答案係非常似, 散景 (bokeh) 差不多一個餅印噉 !!! 唔似八枚又如何 ? 呢支鏡, 獨立品牌咁睇都非常強勁. 

“嘩 !!只有非常似 ? 即係有少少唔似 la !!!! 終於搵到位入, 成功爭取 !!”  

如果大家手上有幾支原廠八枚, 問問大家係唔係支支成像一模一樣 ??  八枚產期由 1958 到 1969, 我估可以叫佢做老鏡, 最後生都有 52歲 !! 過去咁多年, 邊個知前鏡主如何保養支鏡 ? 就當佢 100% 全新, 無塵無花無青苔長放雪櫃, 但有冇機會塊玻璃會變 ? 每一支都一樣咁變 ? 你買完會唔會施佢出街用? 落雨落雪潮濕會唔會拎出街影相 ? 定話繼續長放雪櫃嚟供奉 ?

除非今日 Leica 決定再複刻支 Summaron 8 Element, apple to apple 咁比較根本冇可能. 大家當然可以射激光, 望個 chart, 再喺電腦放大, 左 look look, 右 look look. 咁好玩都係留返畀科學家, 鏡頭研發者做, 我自己出街影相算 🙂

非專業評論

中國製嘅 Leica Summicron 35mm f2 八枚玉係唔係咁無敵 ? 當然唔係 ! 身邊幾個擁有 Leica 八枚用家評論就支鏡全開 f2 太 sharp, 少咗 Leica 八枚玉成名嘅 Leica glow. 自己街攝時發覺膚色夠滑,睇得舒服, 影景物就 nicely saturated. 有人會覺得唔似, 但唔似八枚又如何 ? 呢支鏡, 獨立一支一嚟鏡都非常強勁. 

我拎咗一支正牌八枚, 兩支中國製, 叫朋友們合埋眼續支續支拎起手, 睇下感覺如何 ?! 評語就三支做工感覺一樣, 但因為兩支周制係銅身與鈦身, 感覺反而仲聚手咗. 玩完問返我邊度買到銅版 ?一個就話想要鈦版邊度有得買 ??!! 心諗, 師兄果然識貨, 唔係死牛一面頸 😛

Summicron 8 element light lens lab review

品牌建立

一支鏡: 做工好, 成象好, 究竟夠語夠呢? 長遠睇, 作為一間公司, 個人覺得絕對語夠 !! 成功複製一支歷史名鏡, 只代表公司有能力, 有技術製造. 但創造先係一間品牌嘅核心, 公司先會持久. Leica 成功唔係單單做工好成象好, 佢哋最成功就係識 Marketing, 用自身歷史做 story telling 去建立長遠品牌. 光影鏡頭實驗室 Light Lens Lab 係一間新公司新品牌, 我覺得第一步 (周制八枚玉) 佢哋行得非常成功. 支鏡無嘢好挑, 夾硬要挑的話, 佢唔係真 Leica, 唔係德國製, 攞出街少啲人眼望望, 唔會喺拍賣會見到,  擺喺 IG 唔會多 Like, 二手賣返出去有機會蝕 !! 

你興趣係攝影, 支鏡絕對可以一試 !! 你興趣係炒賣, 短炒可以, 長揸就  ……還看品牌建立 🙂

Posted in Lens Review.

Leave a Reply