Skip to content

相機進化論

近代攝影界最成功既相機一定係智能手機, 可以大膽講, 相比任何年代, 現在全民皆攝影, 相片產量最多既火紅時代. 智能手機咁成功推動攝影, 因為佢方便好玩, 每人至少有一部手機, 仲要日夜機不離手, 有唔同 Apps 可以 download 令肥仔變形男或美女. 加上 social media, 令寂寞的心不再寂寞. 手機影相又得, 拍片又得, 有需要血壓都量得, 手機實在精彩萬分. 唔好話我知你買電話係為咗煲電話粥??

相返, 過去十幾廿年, 攝影界就繼續唔係大機就細機, 唔係長炮就短兵, 唔係神兵就利器, 傳統菲林就係工藝, 數碼就像素, 跟住再高啲像素, 最新鏡頭比 sharp 更 sharp,繼續大吹創新創意夠專業. 聽都聽到我生臭狐, 悶出個鳥來. 新機新鏡同 4 年前買既機鏡有乜分別? 舉例來說, 自己有幾支唔同牌子但同一焦距既鏡, 自問買咁多托呀? 又或今年製 50 定焦, 下年出 51mm ,每年多 1mm 咁出, 出到地老天荒, 長做長有, 長完又可以短, 我仲唔係商業奇才?

攝影初心?

呢幾年, 我嘗試回歸基本, 問問攝影既初心係乜 ? 答案一定唔係器材. 器材呢味嘢, 有錢就買到, what’s so big friggin’ deal, right ? 亦唔係乜春藝術攝影, 喺度扮世外高人, 莫測高深, 噏啲似是而非人生哲理, 熟讀攝影大師”芭芭拉森帕”格言. (唔使 google 芭芭拉係乜水, 我鳩噏舉下例) 大家唔好誤會, 我個人絕對尊重藝術文化, 但藝術呢家嘢, 有部相機就叫自己藝術家, 會唔會兒戲咗?

攝影: 簡單複雜化

攝影其實好簡單, 就係 Story Telling. 用相片講個故仔你睇, 留個紀錄回憶,又或自我爽歪歪 . 係我地諗得複雜咗, 又要大光圈, 又話工藝, 又乜又漆, 唔係多舊魚, 係乜? 睇相片可以用相紙睇, 用電腦睇, 用手機睇. 用任何方法睇都好,最緊要係張照片有冇令你 get 到個訊息. 舉例, 我今日食咗碟叉燒飯, 我用手機影佢再 po 去上 facebook 分享, 呢個動作就是攝影. 你會介意我冇打燈? 冇用大光圈? 冇用再指指點點話構圖唔靚? 我只想留個記錄, 在 2019年六月廿七日我食咗碟叉燒飯, 你就同我講藝術攝影??? 除非碟叉燒比我影到似燒鵝, 我估冇人會咁利害.

咁乜嘢係 story telling ? 你想噏乜,咪就係你既故仔囉, 分別係用部相機塑造出你想噏既嘢, 講屬於你既 story, 唔係叫你講我既故仔.

朋友形容我為”週身刀, 無把利”. 簡單咁講, 即係話我無蕉用. 由菲林 135, 大畫幅 45, 810 玩到數碼, 再去玩拍片, 但無樣嘢出色, 無樣嘢掂, 真係羞家. 全屋就滿地攝影器材. 有器材至少呃到身體朋友, 感覺我有好多嗜好咁,呃鬼就有!!  睇返轉頭, 真係嘥錢又嘥時間.

Leave a Reply