到今日都未正式攞佢出街影，只係喺屋企差下電，玩下自動對焦。部機有非常多 features ，但好多自己用唔著。Sony sLog3 晝質好靚，呢一點有大驚喜。Colour grading 又易做，你可以話 Mac Studio 真係好勁，完全唔吃力。
FX30 價錢唔貴，但唔好以為有相機鏡頭就可以即刻創作。FX30 用 CFExpress type A 又可以用一般 SD 卡。兩款卡雖然一模一樣，但唔可以共用同一個 card reader，部 Mac Studio 個內置 SD card 閱讀器係讀唔到張 CFExress Type A。
Memory card 俾想像中貴。我冇入 CF Express 因為唔想多個 card reader 喺枱上面，所以揀咗 Sandisk 128G SD card，張卡多謝千二大元。點解咁貴？因為佢係 v90 版，有 260 MB/S write。FX30 可以拍出非常之大嘅 file size，要用盡部機嘅功能，就需要高速 SD card，自然地你就要畀多幾蚊。
FX30 有 full size HDMI，自己用咗去接駁個 external mon。如果想用兩個 mon，大家記得喺 menu -> HDMI info Display -> Off ，咁就可以繼續用 touch screen 去控制相機同時又可以用外置顯示器。究竟需唔需要用 external mon ? FX30 有 articulating screen，可以差唔多扭 360 度打轉，對我呢啲非專業大叔非常之重要, 作為阿叔又無力拎多舊嘢, 拍片只係次要，攝影先係主打, 所以一定輕便為主，出街唔會用 external mon. 當然, mon 越大越易睇, FX30 內置 screen 得個 3寸，有少少唔夠大，部相機又無 EVF，所以手動對焦時，尤其用我哋阿叔最愛嘅大光圈時，其實係唔方便。年紀大有老花。
部機玩咗幾日，發覺 Sony NP-FZ100 舊電幾耐用，估計買多舊就應該夠用有凸。大家要留意一點，FX30 冇連充電坐，需要用機身先可以叉舊電。佢連埋插頭， USB-A to USB-C 3.2 線直接插機身叉電，即係話，叉緊電嗰陣冇得影相拍片，或可以駁住線繼續拍片，但舊電就唔會叉。USC-C 附近有拉 LED ，著咗代表叉電，但唔知叉得有幾滿，需要開機先可以知。有 USC-C 其實好正，除咗叉電外，仲可以駁電腦做 webcam 玩直播。可惜 FX3 唔可以用 SSD card，亦唔清楚可唔可以用尿袋供電。個人覺得呢個係 Sony FX30 嘅最大敗筆。希望未來 firmware update 有所改善。
唔少影相佬只會盲目追求 full frame，乜鬼都越大就以為越好。FF 個散景靚啲，高 ISO 又滑啲，但實際上你有幾何出夜街拍片？－條友夠唔夠力抬腳架波頭，加 cage 加額外電，再加幾支燈，幾支 mic 去大製作？呢種心態喺拍片，尤其對新手，又或我哋呢班上咗年紀嘅人，係絕對唔適合，－定要量力而為。千祈唔好發現第二春咁為大而大。唔夠力抬閃親條腰都不知如何是好？
大叔唔覺呢部係入門機，但又未去到專業級，但什麼是專業我又唔知，我估 Netflix approved ? 如果你用開手機拍，又不定時玩下剪片，FX30 呢部機會幾適合你。你可以乜都 set 去 manual mode，玩手動鏡又得，慢慢咁玩上去。阿叔我用開手機拍自己練習瑜伽，今次用 FX30 拍自己，順便試埋 AF。發覺支鏡有時會對錯焦，問題不大．最大問題係個自然光成日變，令 exposure 唔準，應該 set 去 auto exposre，呢個問題當然唔𨶹部機事。次次練習都個幾兩個鐘，舊電完全冇問題，拍完仲有 40% 左右，算係好好。另一樣野要留意，啲片 file size 非常大。如果你好似我咁亂拍，張 SD 卡最好用 128GB。
最後要買個 cage，仲未决定什麼牌子。依家最緊要係用熟佢個 S-log 同埋個 menu。未來試吓手持拍片，睇吓 FX30 防震用唔用到。部機真金白銀自己買，唔需要睇人面色，有碗話碗。